Vaco cercanno a Ddio

Trovo ll’affetto antico

dint’ ’e ricorde vive

VACO CERCANNO A DDIO

di Claudio Pennino

Vaco cercanno a Ddio

e maie pare c’ ’o trovo;

me guardo attuorno... e spio,

ma Ddio ccà nun ce sta.

’Sta vita ca facimmo

rassumiglianno ê bbestie,

senza sapé chi simmo,

certo nun è campà.

Vurria truvà nu senzo

a chesta vita nosta,

e cierti vvote penzo:

« Va trova Ddio addó sta! »

Ma comm’a chi è cecato

e po’ lle torna ’a vista,

i’ veco ’int’ ô criato

Ddio c’ha saputo fà.

Me perdo cu ’e penziere

pe mmiez’a ll’univerzo,

sciulianno cu piacere

mbracci’a ll’Eternità.

E veco na scintilla

dint’a na lacremella,

addó nzerrata brilla

tutta ll’Umanità.

Trovo ll’affetto antico

dint’ ’e ricorde vive,

e raggiunanno dico:

« Allora Ddio ce sta! »

’O veco ogne matina

quanno s’affaccia ’o sole,

’o veco ’int’a na spina

ca pógnere me fa.

E quanno m’appauro,

basta ca guardo ll’uocchie

nnucente ’e nu criaturo,

e dico: « Ddio sta llà. »

(da Primma ca scura notte 2009)

Lettera malinconica

ca fa tant’acqua e nun te sto vicino...

LETTERA MALINCONICA 

di Salvatore Di Giacomo






Luntana staie, Natale sta venenno:
che bello friddo, che belle ghiurnate!...
Friddo ’o paese tuio nne sta facenno?
Pe Natale ve site priparate?

Luntana staie... No... siente... nun è overo,
t’aggio ditto ’a buscia... Chiove a zzeffunno...
me se stregneno ’o core e lu penziero...
nun ce vurria sta’ cchiù ncopp’ a stu munno!

Nun ce vurria sta’ cchiù sulo penzanno
ca fa tant’acqua e nun te sto vicino...
Pe nascere e murì na vota ll’anno
che brutto tiempo sceglie stu Bammino!...

Basta, che faie?... Di’... che te dice ’o core?
Aggiu pacienza... io scrivo e scasso doppe...
nun tengo ’a capa... Te manno stu sciore,
astipatillo ’int’ ’a stessa anviloppe...

Vurria

e gghiesse prufumanno tut’ ’e ccose

VURRIA

di Salvatore Cerino






Vurria ca ’o cielo fosse ’e giglie e rose
e l’aria fosse limpida e curtese,
e gghiesse prufumanno tut’ ’e ccose,
pecché rignassse ’a pace a stu paese!

Pace, fatica e ncore nu bagliore
ca distruggesse ’e ’nfamità d’ ’e gente,
e ce facesse amà cu nu calore
ca è tennerezza, ’ammore e sentimente.

Allere ce chiamassero ’e ssirene
tutt’ ’e mmatine pe’ gghi’ a faticà
e faticanno criarriamo ’o bbene,
ch’ è ’a salvezza ’e tanta umanità.

Pusilleco felice suspirasse
e l’albero cantassero in sordina....
’a musica d’ ’o mare ’accumpagnasse
e ntenneresse tutta Margellina!

E se spannesse l’eco ncantatore
p’ ’e tterre cchiù stramane e cchiù luntane,
e triunfasse ’a Pace, ’o Bbene, ’Ammore,
pecché p’ ’a vita songo cchiù d’ ’o ppane.

E allora se cantassero ’e ccanzone
cu vero sentimento e fantasia
e ’a gente ’e tutt’ ’o munno cu passione,
campasse ntenneruta e in armunia!

Chesto vurria p’ ’o munno sano sano!
chesto vurria p’ ’a gente ’e copp’ ’a terra!
ca mpace e libertà, c’ ’o core mmano,
avria pe sempe alluntanata ’a guerra.

Ingenuamente

p’ ’o nniro ’e st’ uocchie ’ammennola lucente

INGENUAMENTE

di Epifanio Rossetti

... Sarrà pe’ st’ andatura ammartenata,

p’ ’o nniro ’e st’ uocchie ’ammennola lucente,

cert’ è, ca si ve guardo, una vutata

ve vularria pe’ me tutt’ ’e mumente !

Zitto ! Nanni, haggio fatto na penzata:

facimmo cunto comme, overamente,

vui, comm’ a me, nun fusseve accasata,

e i’ cercarria ’sta mana, ingenuamente.

Redite? E si ’sta risa è pe’ risposta,

vo’ di’ ch’ è ’a mia ’sta mana. E, allegramente,

senza me di’ ca tengo ’a faccia tosta,

faciteme stutà ncopp’ a ’stu musso,

st’ arzura ca m’ abbrucia ’e vvene ardente !

’stu core dato a ffuoco cu ’stu rrusso !

Mentre tu duorme

Tu duorme, sì, ma nzuonno ’un truove pace

MENTRE TU DUORME

di Claudio Pennino







Mentre tu duorme, dint’a nu chiarore,
i’ mm’avvicino a tte quase a tuccarte…
Mm’accosto chiano e, senza fà rummore,
risciato ’o sciato tuio pe nun scetarte.

Tu duorme, sì, ma nzuonno ’un truove pace.
’E ccarne te prufumano ’e viuletta…
E, mentre smanie e nun te faie capace,
mpietto te se sbuttona ’a camicetta.

Mentre tu duorme, marmo cristallino,
i’ veco comm’è fatto ’o Paraviso…
Te sfioro appena ’o musso curallino,
e, ’a dint’ ’o suonno, faie nu pizzo a riso.

Mentre tu duorme, ’a luna, lentamente,
trase p’ ’e llastre e t’accarezza ’a fronte…
Sciùlia p’ ’e spalle… e te fa trasparente
comm’a na purcellana ’e Capemonte…

Tu duorme, e i’ conto ’e stelle a una a una…
Chi sa’, a stu mumento, tu addó staie…
Ncopp’ ’a sta vocca, ancora nfosa ’e luna,
te do’ nu vaso e tu nemmanco ’o ssaie.




(da Vela ’e penziere, 1999)

Donn' Amalia 'a speranzella

quanno frie paste crisciute,

mena ll’ oro ’int’ ’a tiella

DONN’AMALIA ’A SPERANZELLA

di Salvatore Di Giacomo





Donn’ Amalia ’a Speranzella,
quanno frie paste crisciute,
mena ll’ oro ’int’ ’a tiella,
donn’ Amalia ’a Speranzella.

Che bellezza chillu naso
ncriccatiello e appuntutiello,
chella vocca ’e bammeniello,
e chill’ uocchie, e chella faccia
mmiez’ ’e tìttole e ’a vurraccia!

Pe sta femmena cianciosa
io farrìa qualunque cosa!…
Piscetiello addeventasse,
dint’ ’o sciore m’ avutasse,
m’afferrasse sta manella,
mme menasse ’int’ ’a tiella
donn’ Amalia ’a speranzella!

Acqua, cumpagne, 'o core è na vrasera

ca c’è venuto Ammore c’ ’a bannera

ACQUA, CUMPAGNE, ’O CORE È NA VRASERA

di Claudio Pennino




Acqua, vicin! ché nel mio core io ardo



Acqua, vicin! ché nel mio core io ardo:
venite, soccorretelo, per Dio!
ché c’è venuto Amor col suo stendardo,
che ha messo a foco e fiamma lo cor mio.
Dubito che l’aiuto non sia tardo;
sentomi consumare: ohimé, oh Dio!
Acqua, vicini! e più non indugiate,
ché il mio cor brucia, se non l’aiutate.


Angelo Poliziano







Acqua, cumpagne, ’o core è na vrasera



Acqua, cumpagne, ’o core è na vrasera:
currite, succurritelo, pe Dio!
ca c’è venuto Ammore c’ ’a bannera,
e ha miso a fuoco e fiamme ’o core mio.
Ma veco ca tardate ’e ogne manera;
i’ me ne struio, facitelo pe Dio!
Acqua, cumpagne, meh nun aspettate,
ca ’o core abbrucia, si nun l’aiutate. 


Claudio Pennino



(da Na guardata amurosa, 2006)

Campanilismo

Le fanno ’e ffeste, aizano ’o pavese

CAMPANILISMO

di Raffaele Viviani

Nu Milanese fa na cosa? embè,

tutta Milano: - Evviva ’o Milanese!

È rrobba lloro e l’hann’ ’a sustenè,

e ’o stesso ’o Turinese e ’o Genovese.

Roma? : - Chisto è Rumano, e si è Rumano,

naturalmente vene primma ’e te.

Roma è la Capitale! E si è Tuscano,

Firenze ne fa subbito nu rre.

Si fa na cosa bona nu Pugliese?

Bari, cu tutte ’e Ppuglie, ’o ffa sapé.

Si è d’ ’a Basilicata o Calavrese,

na gara a chi cchiù meglio ’o pò tené.

È nu Palermitano o Catanese?

tutt’ ’a Sicilia: - Chisto è figlio a mme!

Si è n’Umbro, Sardo, Veneto, Abruzzese,

’a terra soia s’ ’o vanta comme a cche.

Le fanno ’e ffeste, aizano ’o pavese:

senza suttilizzà si è o nun è.

Nun c’è nu Parmigiano o Bolognese

ca ’e suoie nun s’ ’o difendono; e pecchè

si è nu Napulitano, ’a città soia,

’o ricunosce e nun ce ’o ddà a paré?

S’ ’o vasa ’nsuonno e nun le dà sta gioia.

E ’e trombe ’e llate squillano: « Tetèee! »

Qualunque cosa fa, siente: - « E ched'è? »

« ’O ssaccio fà pur’io. » « Senza pretese. »

E chesto simme nuie. Dopo di che,

nun se fa niente ’e buono a stu paese?

E tu, Napule mia, permiette chesto?

Strignece ’mpietto a te, figlie e figliaste.

Arapencelle ’e braccia e fallo priesto:

avimm’ ’a stà a « guaglione » e simmo maste.

T’avante ’e vermicielle, ’e ppummarole:

mmescace pure a nuie si ’o mmeretammo.

Che vvuò ca, cu stu cielo e chistu sole,

te dammo nu saluto e ce ne jammo?

Campanilismo bello, addó si ghiuto?

Facimmolo nuie pure comme a ll’ate,

si no p’ ’a gente ’e Napule è fernuto,

e nun sarrammo maie cunsiderate.

Talento ne tenimmo, avimmo ingegno:

nu poco sulo ca ce sustenimmo,

cunquistarrammo chillu posto degno

ca, pe mullezza nosta, nun tenimmo.

Quanno na cosa è bbona e è nata ccà,

nu milione ’e gente l’ha da dì.

E vedarraie po’ Napule addó va,

cu tutto ca è ’o paese d’ ’o ddurmì.

Brinnese

Aizate ’sti bicchiere:

dimane Ddio ce penza

BRINNESE

di Claudio Pennino

Ddoie cose, ncopp’ ô munno,

fanno avutà ’e ccervelle:

vino russo a zzeffunno,

vase ’e femmene belle.

’O vino te mpupazza,

ma arape tutt’ ’e pporte.

Nu fiasco ’e sta bbubbazza

acconcia ’e ccose storte.

Te fa cantà cu ’a voce

chi tene ’o male ’e mole,

te fa cchiù rrosse e ddoce

’e vvocche d’ ’e ffigliole.

E ogne vaso sana

meglio ’e na mmedecina;

vase ’e Bellambriana

ca sanno ’e falanghina.

Chesta è ’a ricetta e ’a ddosa

ca fa campà cient’anne:

ll’anema s’arreposa

scurdannose ’e malanne.

E si chesto ce resta,

amice mieie, curaggio,

stateve sempe nfesta

ch’ ’a vita è nu passaggio.

Acqua passata è aiere,

e ll’ogge stà mpartenza.

Aizate ’sti bicchiere:

dimane Ddio ce penza!

(da Vela ’e penziere, 1999)

Addio, stagione!

E ’a sera, ’o ssaccio, tu te miette a ccosere

ADDIO, STAGIONE

di Giovanni Panza





Mo c’accummencia a fà frischetto, è inutile,
nun putimmo sta cchiù fore ’o balcone.
E ’a sera, ’o ssaccio, tu te miette a ccosere.
Addio, serate belle d’ ’a stagione!...
Addio, serate ’e luna!

Già mmiez’ ’o vico nun se vede n’anema,
quanno ce salutammo ca te lasso.
Comme fa notte, ’a gente se ne traseno,
addò ch’io nun putevo dà nu passo
senza di’: « Permettete...» ?

E ’a copp’ ’e mmura d’ ’e ciardine volano
’e ffronne secche. Addio, addio stagione!
Tu ’a sera cuse e i’ me ne vaco, ’o ssoleto,
cu ’e panne chine ’e nippole ’e cuttone,
cchiù triste e cchiù nguttuso.

« Cosce 'argiento »

pe’ « vvuto » lle purtaie

’e ccosce ’argiento

« COSCE ’ARGIENTO »

di Raffaele Chiurazzi




« Cosce ’argiento » è tantillo:
pare nu strummulillo.
Nascette ciunco; ’a mamma
iette a du San Bicienzo:
sciure, cannéle, ’ngienzo,
minacce e strille:

— San Bicié, fìgliemo è ciunco!
T’abbruscio ’o scaravattelo
si nun me faie ’a grazia! —

E, cumminfatte,
pe’ « vvuto » lle purtaie
’e ccosce ’argiento
d’ ’o piccerillo;
e ’o piccerillo ascette
redenno ’a dint’ ’a cchiesia e cammenaie.

Ma chello che cumbina
stu « Cosce ‘argiento »
mo che ttene nov’anne,
so’ ccose ascì ampazzia!

Sta sempe mmiez’ ’a via;
corre, va, vene,
mena ferbune,
fa ’a petriata,
sciacca ’e guagliune,
saglie ncopp’ ’e ccarrette,
s’appenne arreto ’e tramme,
arreto ’e biciclette:
inzomma, scanza ’a morte
cinche, se’ vote ’o iuorno.

’A mamma ca se vede
sempe mmiez’ ’a na guerra,
p’ ’a foia che ttene ’o figlio,
allucca e chiagne cu ’e ddenocchie ’nterra:
— San Bicié, mo voglio ’a grazia!
Ll’ hê ’a fa’ ciuncà! Ciuncà ncopp’ ’o divano...
e i’ mo t’ ’o porto ’argiento sano sano! —

N'addore 'e rose

na principessa cu na rosa nzino

saglie ô paese e vene â parta mia

N’ADDORE ’E ROSE

di Claudio Pennino





N’addore ’e rose trase p’ ’a fenesta;
vene ’a luntano, forze d’ ’a marina.
È nu prufumo ca mo va e mo resta
mettenno ’o buonumore d’ ’a matina.

Lasso ogne cosa e nzerro ll’uocchie doce:
me piace ’e penzà ca pe ll’onne ’argiente,
na nave fatta cu na scorza  ’e noce,
porta ’st’addore ’e rose ’a ll’Urïente.

S’affannano ’int’ ô puorto ’e marenare
attuorno ’e vvele arricamate d’oro.
Nterr’ ’a banchina correno a migliare
chiammate d’ ’o prufumo ’e ’stu tesoro.

Risciato forte. E sento cchiù vicino
n’addore ca m’allumma ’a fantasia:
na principessa cu na rosa nzino
saglie ô paese e vene â parta mia.

(da Primma ca scura notte, 2009)

Testamento

Quanno mor’io, chiagniteme

nu quarto d’ora: e basta.

TESTAMENTO

di Edoardo Nicolardi






Quanno mor’io, chiagniteme
nu quarto d’ora: e basta.
Che m’atterrate all’ùnnice?
Salute e bbene! ’E ddoie menàte ’a pasta.

Se sape: ’a vita solita,
cchiù o meno, su per giù.
E allora fosse ’a ridere:
pecché so’ muorto nun magnate cchiù?

Faciteme n’esequia
semplice quanto maie.
’O carro ’o municipio.
Te mmòccano ’int’ ’o carro, e te ne vaie.

« Aaaah, Baccalààà…!» S’ ’o portano
p’ ’e vicule, ’o pueta.
Meglio accussì! Credìteme
ca sparagnate ’a roseca e ’a muneta…

Pecché: facenno ’annunzio
ncopp’ ’o giurnale (’ê ’a fa’
cinco o sei lire ’a lìnia)
na ciento lire sempe se ne va.

Ll’amice intanto ’o lleggeno
e ognuno legge, e penza:
« E chisto è n’ato esequio!
Comme nun vaie! Nc’ ’ê ’a j’. Pe’ cummenienza ! »

E allora vuie pigliasseve
nu carro ’e primma classe…
Sciure, carrozze, prièvete…
Cammariere c’ ’o tubbo e ’o fracchisciasse…

E ’o mpiccio, ’int’ a ’stu vìcolo?
E ’a folla ca s’aruna?
E ’amice ca sfastèdiano:
« Che Ddio! S’è ditto a ll’ùnnice e mo’ è ll’una!

E che maniera! E’ inutile,
chi è scucciatore, more
scucciànnote nzì a ll’urdemo!
Sinò t’ ’o scuorde ch’era scucciatore! »

E se un amico, in lacrime,
sulla composta bara
ti fa l’elogio funebre?
Poveri muorte tuoie! Chi ll’arrepara?

E si accummencia a chiovere
nfromme se move ’o carro?
Madonna, chilli prièvete!
Ggiesù, chilli cumpagne c’ ’o catarro!

Quanno mor’ì’, ca ’o miedeco
stennesse ll’atto ’e morte,
e… nun facite nchiudere
manco ’o miezo purtone, a ’o guardaporte!

Si me vulite chiagnere,
nu quarto d’ora e basta.
Che m’atterrate a ll’ùnnice?
Salute e bbene! ’E ddoie, menàte ’a pasta.

Brinnese

ELOGIO DEL BRINDISI

Storie e aneddoti del bere conviviale

BRINNESE

di Luigi Chiurazzi

So ghiornate tutte cheste

de gran gioja e d’allegria:

mille e cchiù de cheste feste

dongo a chesta compagnia.

Co salute e co denare,

accossì pozzate stare.

Mantenere chesta vita

sempe fresca e divertita,

fare sempe campagnelle,

co le nenne fresche e belle,

sempe vuje pozzate fa;

nfì a la morta chesto ccà. 

’A cchiesa è chiena, e trase ancora gente…

’O MIRACULO

di Claudio Pennino

                                 ’O iuorno ’e S. Gennaro

’A cchiesa è chiena, e trase ancora gente…

Tutte vonno arrivà ’nnanz’a ll’altare

c’arde ’e cannele e ccére a centenare.

E pare d’oro tanto ca è lucente.

Pe’ mmiez’ ’a folla io te tengo mente.

Sta folla ca ce sbatte comm’ ’o mare…

e, comm’a vvarca senza marenare,

veco ca t’alluntane lentamente…

Nuvule ’e ’ncienzo. ’A cchiesa s’arrevota.

’A folla smania, prega, sbatt’ ’e mmane:

’O Santo scioglie ’o sango n’ata vota!

Ma a tté, nun te se scioglie ’o sango mpietto.

Te perdo!… E intanto,  sònano ’e ccampane.

Sònano a ffesta pe’ mme fà dispietto.

(da ’A strata d’ ’e stelle, 2001)

Alleramente...

I’ mo’ già penzo che sarrà ’sta vita

ALLERAMENTE…

di Rocco Galdieri





Me ne vogl’ì’, cantine cantine,
pe’ copp’ ’o Campo, a Pucerïale.
Voglio campà cu’ ’e muorte pe’ vvicine…
ca nun sanno fa’ male.
Nu’ pàrlano… Nu’ càntano… So’ buone…
E so’ ’e meglie inquiline:
so’ chille ca nu’ pavano pesone!

Là m’affitto, cu’ poche denare,
’na cammarella pe’ me surtanto.
Che mme ne ’mporta ca nun veco ’o mare?
M’abbasta ’o campusanto!
Amice? No! M’aggia fa’ chiatto e ttunno:
ll’amice, ogge, so’ rare.
Sulo… quacche cucchiere ’e Bellumunno.

Si vene, ’a sera, pe’ ’na partita,
sia benvenuto. ’Nu litro ’e trenta.
I’ mo’ già penzo che sarrà ’sta vita,
ca mme chiamma e me tenta!
Vevo e dormo e nisciuno me ’ncuieta…
E all’ora stabilita,
canta ’na ciucciuvettola e mme sceta!

I’ nun me voglio piglià veleno…
Addio, canzone, ca so’ turmiente!
Voglio sentere ’a pala ’int’ ’o tturreno;
’o chianto d’ ’e pariente…
E quanno vene ’a morte ’a parta mia,
faccio ’e ll’esequie ammeno:
m’ ’o ffaccio appere… ch’è ’nu passo ’e via!

'A gatta d' 'o palazzo

pe’ na fenesta, si t’ ’a scuorde aperta...

’A GATTA D’ ’O PALAZZO

di Eduardo De Filippo

Trase p’ ’a porta,

pe’ nu fenestiello,

pe’ na fenesta, si t’ ’a scuorde aperta...

quanno meno t’ ’aspiette.

Pe’ copp’ ’e titte,

da na loggia a n’ata,

se ruciuléa pe’ dint’ ’a cemmenera.

E manco te n’adduone

quann’è trasuta:

pe’ copp’ ’o curnicione

plòffete!, int’ ’o balcone,

e fa culazione

dint’ ’a cucina toja.

È ’a gatta d’ ’o palazzo.

Padrone nun ne tene.

Nunn’ è c’ ’a vonno male,

ma essa ’o ssape

che manc’ ’a vonno bene.

Te guarda cu dduje uocchie speretate:

lésa.

N’ha avute scarpe appriesso e ssecutate.

È mariola!

Ma ’a povera bestiella, ch’adda fà?

È mariola pecché vo mangià.

È mariola...

Chest’ ’o ddice ’a ggente;

ma i’ nun ce credo, pecché, tiene mente:

tu lasse int’ ’a cucina,

che saccio...

nu saciccio.

Làsselo arravugliato

dint’ ’a na bella carta ’e mille lire.

Tuorne ’a matina:

’a mille lire ’a truove, che te crire?

Nzevata. Ma sta llà.