Mo passa

Ma tu me manche assaie…

MO PASSA

di Claudio Pennino

                                                         madrigale

« Mo passa – i’ stesso dico - mo me passa

chesta malincunia ca nun me lassa. »

E allora nun ce penzo,

e vaco mmiez’ ’a ggente

e cerco, a ’sti gghiurnate, ’e dà nu senzo,

e a chistu core ardente,

na mana a sgravuglià chesta matassa.

E tanno dico: « ’O ssento… mo me passa… »

Ma tu me manche assaie…

e ’sta malincunia nun passa maie.

'A vasciaiola

’A VASCIAIOLA

di Arturo Trusiano

Mio caro don Linnardo, nun è cosa,

nun pozzo maie addeventà tua sposa,

pecché tu si’ nu nobile, un contino,

e i’ so’ na vasciaiola d’ ’o Pennino.

Tu vuo’ che a fforza io parlo il taliano?

E arrevutammo ’o vico sano sano...

So’ tante ’e ffessarie di questa vocca,

che ’a gente dice: Oi’ ne’, ma va te cocca...

Ncopp’ a ll’onore, doppo tre parole

mi abboffano di torze e pommirole.

Propeto ieri, al lario del Mandracchio,

parlai e mi allazzarono un pernacchio.

Me puorte dinto ’e primme ristorante,

’e meglie pranze tu me miette nnante,

ma ch’aggia fa’? Me chiammarraie scorrotta...

io preferisco ’a zuppa ’e carnacotta.

Iammo a vedé « La forza ’e l’intestino »

e int’ ’o San Carlo io dormo a suonno chino...

Sti sorde lloco, oi’ ni’, cu mmico ’e sciupe,

pecché me piace cchiù ll’opera ’e pupe.

E po’... che d’è st’ammore? Maie nu « schiatte »,

e invece io voglio ll’ommo ca me vatte,

ch’è smaniuso e dice, cu trasporto:

« Quanto si’ bbona... sango ’e chi t’è morto!... »

I’ semmenaie ’a terra e n’ato mète

ca pe vuie brucio, e nun me succurrite

I’ SEMMENAIE ’A TERRA E N’ATO MÈTE

di Claudio Pennino

I’ seminai il campo, un altro il miete

I’ seminai il campo, un altro il miete;

e aggio ispeso la fatica invano.

Altri è nell’acqua, e io moro di sete;

altri è salito, e io rimasto al piano.

Un altro ha preso, e io tesi la rete,

e sol la piuma è a me rimasto in mano.

Fortuna a torto fa sue voglie liete,

ché per voi ardo e non mi soccorrete.

Angelo Poliziano

I’ semmenaie ’a terra e n’ato mète

I’ semmenaie ’a terra e n’ato mète,

propio a vacante faticaie p’ ’o ggrano.

N’ato s’abboffa d’acqua, e i’ moro ’e sete;

uno è sagliuto ncimma e i’ resto nchiano.

N’ato ha ’ngappato, e i’ aparaie ’e ddete,

e sulo penne mo me trovo mmano.

’A sciorta a tuorto me ne da ferite,

ca pe vuie brucio, e nun me succurrite.

Claudio Pennino

(da Na guardata amurosa, 2006)

So' dieci' anne

sulitaria, penzarosa,

ricamanno ’a veste ’e sposa...

SO’ DIECI’ ANNE

di Libero Bovio

So’ dieci’ anne, e, penzarosa,

tu ricame ’a veste ’e sposa:

so’ dieci’ anne ca te spiego

ca pe’ me nce vo’ n’impiego...

So’ dieci’ anne... E tu m’aspiette

tutt’ ’e ssere, ’npunto ’e sette,

for’ ’a ll’asteco, affacciata...

Saglie ’o sisco ’a miezo ’a strata,

cade ’a ll’asteco na rosa

cu na lettera attaccata.

Dice ’a lettera: « Mio amore,

sii costante nella vita,

ché il mio cuore è nel tuo cuore...

                               Margherita ».

So’ dieci’ anne... E dint’ ’a strata

cchiù ’e na cosa s’è cagnata...

Geretiello ’o canteniere

s’è vestuto ’a berzagliere,

Furtunata ’a sfurtunata

ll’ata sera s’è spusata

dint’ ’a cchiesia a bintun’ore...

Margarì, prega ’o Signore

ca nce desse fede e forza

pe’ ’sta vita e pe’ ’st’ammore...

Quanta suppliche aggio scritto,

refunnenno carta e ’gnosto.

Tutt’ ’e juorne: « Il sottoscritto

                    chiede un posto ».

So’ dieci’ anne, ma a’ stess’ora,

Margarì, m’aspiette ancora...

sulitaria, penzarosa,

ricamanno ’a veste ’e sposa...

« Nonna nonna nunnarella... »

cchiù ’e na connola nuvella

tu te guarde tristamente...

E na lacrema cucente

cade ncopp’ ’a veste ’e sposa

ca, stracquata, tiene mente.

Ma a’ stess’ora, ’a stessa rosa

porta ’a lettera attaccata,

condicendo: « La tua sposa

                        sta malata! »

Viene pe mare

VIENE, CA T’ASPETTO

 di Claudio Pennino

Viene, ca t’aspetto.

Viene dint’ ’a staggione,

p’ ’e strate sulitarie d’ ’e ccampagne,

addó ’e passe smoveno nuvole ’e calore.

Viene cu ’e ttempeste,

quanno è vierno,

e, ’o iuorno, puveriello,

dint’a niente, more mbraccio â sera.

Viene dint’ ’o profumo

’e na matina ’e primmavera;

viene dint’ ’o sapore

’e na mullica ’e pane.

Dint’ ’o culore ’e na cerasa rossa,

dint’ ’o silenzio d’ ’e pparole

ca nun so’ state dette.

Viene, ca t’aspetto.

Viene pe mare,

e, pe signale, mpont’ ’a varca,

appienne, comme fosse na lampara,

’a luna ianca.

Quanno fa notte, nascostamente,

viene ’int’a nu suonno.

Viene, ca t’aspetto.

(da ’A pianta d’ ’a felicità 2004)

partetteno ’e Rre Magge ’a ll’Urïente

’O QUARTO RRE

di Claudio Pennino

                        

                                 No’ si volta chi a stella è fiso
                                               Leonardo Da Vinci

Quanno p’ ’o cielo accumparette ’a stella,

partetteno ’e Rre Magge ’a ll’Urïente.

Ma ’o quarto Rre dicette: « Nun è chella

ca ce accumpagnarrà nzieme cu ’e viente. »

E s’abbiaie pe na via stramana,

cu ’a spata argiento allato e ’a vesta ’e séta…

mentre ’e cumpagne, pe na notte sana,

currettero addereto a ’sta cumeta.

Passaie pe nu scarrupo e na vallata,

tagliaie nu monte quanto a na petrella…

mentre p’ ’o cielo, ’a stella nnargentata,

luntana, addeventava piccerella.

Tanto s’alluntanaie p’ ’o bosco futo,

c’ ’a stella ’a miez’ ’o cielo scumparette;

e nun truvaie cchiù ’a strata, ’o Rre saputo,

e dint’ ’a notte scura se perdette.

(da ’A pianta d’ ’a felicità 2004)

Natale

Sta zampogna comm’è doce

NATALE

di Giovanni Capurro

E che fa si a nove lire

sta signata ancora ’a nzogna,

si stu core m’è zumpato

quanno ha ntiso na zampogna?

Che mme preme ’a malatia,

ll’uvaiuolo, ’e fruttaiuole,

quanno sento mmiezo ’a via

sparà tracche e terziole?

Chi ce penza ca ’e capune

nun so’ cosa pe chist’anno,

quanno ’e lume n’ata vota

veco ’a sera, cammenanno?

Chi ce penza a ’o portafoglio?

Ma chi ’e cconta ’e ccartuscelle,

quanno vide n’ata vota

pe’ Tuleto ’e bbancarelle?

E che fa si ’o tabbaccaro,

senza sale, piglia e nzerra,

quanno saie ca finalmente

è fernuta chesta guerra?

Iesse a ’e ciele ’o fritto ’e pesce,

iesse a ’e ciele ’o capitone,

ma tu almeno nu bengala

può appiccià fora ’o balcone.

Aggio visto purtà ncapo

nu presebbio ’a nu guaglione,

nu vicchiotto che passava

cu nu gruosso buttiglione.

Na figliola cu ’e pullaste,

nu nennillo c’ ’o Bammino,

nu garzone ’e canteniere

cu na nferta e ’o quarto ’e vino...

Ah! Natale beneditto,

tu sta vota puorte ’a pace:

che putenza chella grotta,

fatta ’e sùvero e vammace!

Io pe’ te me sento ancora

n’ata vota guagliunciello!

Sta zampogna comm’è doce,

chistu suonno quant’è bello!

Tu, Natale, sempe ricco,

sempe caro me si’ stato,

tu ca tuorne e me ricuorde

tutt’ ’e ccose d’ ’o ppassato!