appuntunato sott’a nu lampione

STA UNO CHE MM’ASPETTA

di Claudio Pennino

                       Io vi ho accusati e non vi siete ribellati,

                                              eppure eravate innocenti tutti quanti…

                                                                 (Eduardo, Le voci di dentro)

Appuntunato sott’a nu lampione,

sta uno che mm’aspetta mmiez’ ’a via.

Pe dint’ ’e llastre nchiuse d’ ’o balcone,

senza me fa vedé ’o faccio ’a spia.

Sta llà sarranno bbuono cchiù ’e doie ore:

na sicaretta stuta e n’ata appiccia.

Certo sarrà ’o primmo accrastatore,

cu chella brutta faccia verde e miccia.

Sto comm’ ’o suricillo ’int’ ’o mastrillo.

A chi pozzo chiammà pe cercà aiuto?

Esco for’ ’o balcone e do’ nu strillo?

Chillo tira na botta e te saluto!

Vide che ddiece ’e guaio ca stò passanno:

me stongo appauranno sano sano.

Ma c’aggio fatto ca me sta appustianno?

I’ manco ’o saccio a ’stu bellu crestiano!

E, intanto, s’è piazzato mpont’ ’o vico,

guarda ’o rilorgio e stuta ’a sicaretta.

’A dint’ ’o scuro sponta n’ato amico,

chist’è ’o mumento: cacciano ’a mulletta!

Ma chisto ch’è venuto… è na guagliona,

e, primma ch’isso parla, ’o dà nu vaso.

Mmosta ’o rilorgio, vo’ sfilà ’a curona…

essa ll’abbraccia e ’o vasa mpont’ ’o naso!

S’astregneno e s’abbiano abbracciate,

a core a core, dint’a notte scura.

Ggiesù, i’ tremmo ancora, ce penzate?

chillo aspettava a n’ata. E che paura!

(da ’A strata d’ ’e stelle, 2001)