Fravecature

FRAVECATURE

di Raffaele Viviani

All’acqua e a ’o sole fràveca

cu na cucchiara ’mmano,

pe’ ll’aria ’ncopp’a n’anneto,

fore a nu quinto piano.

Nu pede miso fauzo,

nu muvimento stuorto,

e fa nu vuolo ’e l’angelo:

primma c’arriva, è muorto.

Nu strillo; e po’ n’accorrere:

gente e fravecature.

– Risciata ancora… È Ruoppolo!

Tene ddoie criature!

L’aizano e s’ ’o portano

cu na carretta a mano.

Se move ancora ll’anneto

fore d’ ’o quinto piano.

E passa stu sparpetuo,

cchiú d’uno corre appriesso;

e n’ato, ’ncopp’a n’anneto,

canta e fatica ’o stesso.

’Nterra, na pala ’e cavece

cummoglia ’a macchia ’e sango,

e ’e sghizze se scereano

cu ’e scarpe sporche ’e fango.

Quanno ô spitale arrivano,

la folla è trattenuta,

e chi sape ’a disgrazia

racconta comm’è gghiuta.

E attuorno, tutt’ ’o popolo:

– Madonna! – Avite visto?

– D’ ’o quinto piano! – ’E Virgine!

– E comme, Giesucristo … ?!

E po’ accumpare pallido

chillo c’ ’ha accumpagnato:

e, primma ca ce ’o spiano,

fa segno ca è spirato.

Cu ’o friddo dint’a ll’anema,

’a folla s’alluntana;

’e lume già s’appicciano;

’a via se fa stramana.

E a’ casa, po’, ’e manibbele,

muorte, poveri figlie,

mentre magnano, a tavola,

ce ’o diceno a ’e famiglie.

’E mamme ’e figlie abbracciano,

nu sposo abbraccia ’a sposa…

E na mugliera trepida,

aspetta, e nn’arreposa.

S’appenne ’a copp’a ll’asteco;

sente ’o rilorgio: ’e nnove!

Se dice nu rusario…

e aspetta e nun se move.

L’acqua p’ ’o troppo vóllere

s’è strutta ’int’ ’a tiana,

’o ffuoco è fatto cénnere.

Se sente na campana.

E ’e ppiccerelle chiagneno

pecché vonno magna’:

– Mammà, mettimmo ’a tavula!

– Si nun vene papà?

’A porta! Tuzzuleano:

– Foss’isso? – E va ’arapi’.

– Chi site? – ’O capo d’opera.

Ruoppolo abita qui?

– Gnorsì, quacche disgrazia?

Io veco tanta gente…

– Calmateve, vestiteve…

– Madonna! – È cosa ’e niente.

È sciuliato ’a ll’anneto

d’ ’o primmo piano. – Uh, Dio!

e sta ô spitale? – È logico.

- Uh, Pascalino mio!

’E ddoie criature sbarrano

ll’uocchie senza capi’;

’a mamma, disperannose,

nu lampo a se vesti’;

’e cchiude ’a dinto; e scenneno

pe’ grade cu ’e cerine.

– Donna Rache’! – Maritemo

che ssà, sta ê Pellerine.

È sciuliato ’a ll’anneto.

Sì, d’ ‘o sicondo piano.

E via facenno st’anneto,

ca saglie chiano chiano.

– Diciteme, spiegateme.

– Curaggio. – È muorto?! – È muorto!

D’ ’o quinto piano. ’All’anneto.

Nu pede miso stuorto.

P’ ’o schianto, senza chiagnere,

s’abbatte e perde ’e senze.

È Dio ca vo’ na pausa

a tutte ’e sufferenze.

E quanno a’ casa ’a portano,

trovano ’e ppiccerelle

’nterra, addurmute. E luceno

’nfaccia ddoie lagremelle.