'A luce 'e na fenesta

S’allumma na fenesta

’A LUCE ’E NA FENESTA

di Claudio Pennino

Sperduto ’int’ ê penziere,

cu ll’anema appaciata,

comm’a tant’ati ssere,

fernesce ’sta iurnata.

Veco ’a campagna verde

ca ’nnante a mme scumpare,

e addó ll’uocchio se perde,

na luce già accumpare.

S’allumma na fenesta,

e ll’ombra ’e nu criaturo

s’accosta e llà se resta,

guardanno dint’ ô scuro.

Chi sa’ che sta cercanno

smiccianno â parte ’e fora;

chi sa’ a chi sta aspettanno

ca nun arriva ancora.

Va trova si me vede

dint’a ll’oscurità.

Giesù, mo nun se crede,

 ma quanta pena fa.

Nisciuno cumpagniello,

nisciuna voce ’o chiamma;

certo ’stu criaturiello

starrà aspettanno ’a mamma.

E, mmiez’a ll’ombre scure,

i’ mm’ ’o guardo ’e rimpetto;

e, comm’a isso, i’ pure,

so’ secule c’aspetto.

Na vita ’ndifferente,

sempe a aspettà a quaccuno;

e ’a sera, puntualmente,

nun vene maie nisciuno.

Ll’anema s’appaura,

e pare, ncopp’a ll’onna,

’int’a ’sta notte ascura,

na varca ca s’affonna.

Surtanto ’sta fenesta,

comm’a na luce-luce,

pare, mmiez’ ’a tempesta,

nu faro ca fa luce.

(da Primma ca scura notte, 2009)