Nisciuno s'accuntenta

pure chi è nano se vo’ fà gigante

NISCIUNO S’ACCUNTENTA

di Claudio Pennino

Nisciuno cchiù a ’stu munno s’accuntenta,

e, pure ’o ttroppo, pare sempe poco.

S’è perza ’e l’umeltà pure ’a semmenta,

e chi agliutteva va truvanno ’o sfoco.

Chi nasce quatro cerca e se fa tunno,

e chi sta arreto vo’ schiaffarse annante;

cercanno ’o Paraviso ’int’ ’o zeffunno,

pure chi è nano se vo’ fà gigante.

Tutto se vo’ senza fatica e ampressa,

ca chi nun tene niente, niente vale.

Ce ne stesse uno ca nun tene pressa,

pare ca stammo ncopp’ ’o tribbunale.

Nisciuno cchiù se ncanta pe na rosa,

nisciuno afferra ’e stelle cu na mana…

correno tuttequante senza posa:

e, dint’a niente, fuie na vita sana.

(da ’A strata d’ ’e stelle, 2001)