Cu na faccella tonna, ride Ggiesù Bammino

LL’ADDORE D’ ’O NATALE

di Claudio Pennino

Spàrano dint’ ô vico:

sinò nun è Natale.

’A copp’a na fenesta,

s’appiccia nu biancale.

Dint’a na festa ’e luce,

se spanne attuorno e saglie

n’addore amarulillo

’e zurfo e fummecaglie.

Trase d’ ’a senga aperta

ca sta dint’ â cucina,

mmescànnose c’ ’addore

d’ ’o broro d’ ’a gallina.

Ncopp’a na vrasa, ’ntanto,

bruscia na pigna verde,

e nu prufumo ’e musco,

attuorno va e se sperde.

Natale! Na campana,

voce gentile e doce,

già sona ’a mezanotte:

e ce facimmo ’a croce.

Chesta manella toia,

’e marmo cepullino,

Ggiesù, comme prufuma

’e scorze ’e mandarino.

Cantano ’e pasturielle

ncopp’ ô presebbio: « È nnato! »

Allummano, ’e Rre Magge,

’o ncienzo prufumato.

Maria aspetta ’o figlio:

« ’A vi’ ca stenn’ ’e bbraccia? »

Tu ’o piglie e c’ ’a manella

te ll’accarizze ’a faccia.

E tutte quante ’e ccose,

nnant’a ’sta fantasia,

prufumano d’ammore,

pecché nasce ’o Messia.

Cu na faccella tonna,

ride Ggiesù Bammino,

e tutt’attuorno spanne,

n’addore ’e mandarino.

(da Primma ca scura notte 2009)

Quanno nasce nu criaturo...

QUANNO NASCE NU CRIATURO

di Claudio Pennino

Quanno nasce nu criaturo,

’ncielo, pronta, na fatella,

corre e appiccia dint’ ’o scuro,

lustra e nova n’ata stella.

Na cumeta ’nnargentata

ca lle dà forza e curaggio,

e lle ’mmosta qual è ’a strata,

comme fosse nu Rre Maggio.

E p’ ’o cielo è ’a cchiù splennente

comm’ ’a stella d’ ’o Messia.

Quanno ’a mamma ’a tene mente

dice: «Chella è ’a stella mia!»

E pe’ cchesto tanta stelle

fanno chiare ’e nnotte scure:

stelle grosse e piccerelle

c’accumpagnano ’e ccriature.

(da ’A strata d’ ’e stelle, 2001)

’O llegno sott’ ’e bòtte iastemmava

’O MASTERASCIO

di Claudio Pennino

Nu paro ’e lente sporche ’e secatura

’ncopp’a nu naso russo d’ ’o ’mbriacone,

e, areto a chella lenta sporca e scura,

dduie uocchie fisse ’ncopp’a nu bancone.

Pe’ dint’a na felinia ’nfacci’ ’o muro,

cercava ’e se salvà nu muschiglione…

e ’o masto falignamme, don Arturo,

taglianno se cantava na canzone.

’O llegno sott’ ’e bòtte iastemmava,

cu tutto ca era cippo staggiunato…

ma ’o masto, ’ndifferente, s’ ’a siscava.

E d’ ’o llegno, c’aveva iastemmato,

mast’Arturo facette, ca pregava,

nu bellu Giesucristo addenucchiato.

(da Vela ’e penziere, 1999)

Pecché te voglio bene

ncimm’a na torre te vurria tené

PECCHÉ TE VOGLIO BENE

di Claudio Pennino

Pecché te voglio bene,

i’ te vuless’avé sulo pe me;

e comm’a na riggina,

ncimm’a na torre te vurria tené.

Pecché te voglio bene,

nun suppurtasse ’e te vedé nzerrata,

e t’arapesse ’a porta

e te dicesse: « Va, si’ libberata! »

Pecché te voglio bene,

i’ me t’annascunnesse ’int’a ’sta mano,

e te strignesse forte,

pe nun te fà vedé d’ ’o munno sano.

Pecché te voglio bene,

i’ me pentesse ’e chesta debbulezza,

e t’arapesse ’a mano,

e te facesse, doce, na carezza.

Pecché te voglio bene,

i’ t’attaccasse ’o core cu ’e penziere,

e cu catene d’oro,

e te tenesse comm’ ’e priggiuniere...

Ma doppo te sciugliesse,

e te dicesse: « Niente te trattene! »

Pecché facesse chesto?

’O vvuó sapé? Pecché te voglio bene.

(da Primma ca scura notte, 2009)

S'io putesse vulà...

m’aizasse àveto ’ncielo…

S’IO PUTESSE VULA’

di Claudio Pennino

S’io putesse vulà,

m’aizasse àveto ’ncielo,

’a copp’ ’e nnuvule,

e me spannesse pe’ dint’a ll’aria liggera e fina.

E, comm’a rundinella,

me ne vulasse ’nzieme ô viento,

e me stennesse,

e facesse tuffe e capriole,

zumpetielle e sciuliarelle,

pe’ dint’a ll’aria sempe cchiù liggera e fina.

Ma cundannato ccà,

’ncopp’a sta terra,

so’ n’arbero chiantato ’int’a sti pprete…

Avveluto…

disperato…

e nun riesco a vulà cchiù àveto ’e nu zumpo.

Addó ca s’io putesse vulà,

m’aizasse àveto ’ncielo…

E stu penziero mio

s’ ’o porta ’o viento,

e vola ’a copp’ ’e nnuvule,

e se stenne,

e fa tuffe e capriole,

zumpetielle e sciuliarelle

e libbero,

se cunnuléia,

pe’ dint’a ll’aria sempe cchiù liggera e fina.

(da Vela ’e penziere, 1999)

Na cosa sola

tu fusse ll’auciello e io ’a caiola

NA COSA SOLA

di Claudio Pennino

Te voglio cunnulià dint’ a ’sti bbraccia,

comme si fusse ancora na criatura,

saziarme d’ ’a nnucenza ’e chesta faccia,

ca ’o munno è malamente, e fa paura.

Te voglio tené comme a na Mbriana...

comme a na santa: sotto a na campana;

addeventà cu tte na cosa sola...

tu fusse ll’auciello e io ’a caiola.

(da Villanelle, 2016)

'O specchio rutto

P’arraggia hê fatto ’o specchio mille piezze

’O SPECCHIO RUTTO

di Claudio Pennino

P’arraggia hê fatto ’o specchio mille piezze,

e, mille vote, chistu specchio rutto,

me dice ca tu m’odie e me dispriezze,

ca mo è fernuto ’o bello e vene ’o brutto.

E veco p’ogne crastula ’sta faccia,

ca smaledice, strilla e m’amminaccia...

ma si surtanto faie nu pizzo a riso,

io veco mille vote ’o paraviso.

(da Villanelle, 2016)

Lenzulo 'e seta

’a dint’ ’o suonno doce io v’abbracciasse

LENZULO ’E SETA

di Claudio Pennino

Vulesse addeventà lenzulo ’e seta

pe cummigliarve quanno v’addurmite,

pe ssentere ’o vvelluto sott’ ’e ddeta

’e chesti ccarne lisce e sapurite.

E si lenzulo overo addeventasse,

’a dint’ ’o suonno doce io v’abbracciasse,

dint’ a ’sti braccia sempe ve tenesse,

tutt’ ’e smanie d’ammore io ve sciugliesse.

(da Villanelle, 2016)

'O paese d' 'e suonne

addó ’e ccriature dormeno redenno

’O PAESE D’ ’E SUONNE

di Claudio Pennino

                                               a Clarita

Vulesse sapé propio addó se trova

’o paese d’ ’e suonne d’ ’e ccriature;

si pe ce ì’, se va pe na via nova,

o si se va p’ ’e strate fredde e scure.

Chisà si se va ’e notte o c’ ’o chiarore,

quanno se dorme o si se sta scetato;

ca sempe ll’ommo sonna, a tutte ll’ore,

a uocchie apierte o comm’a nu stunato.

Quanno arrivasse - e chesto ognuno ’o ddice -

addó ’e ccriature dormeno redenno,

pe tte scigliesse ’o suonno cchiù felice,

e t’ ’o purtasse mentre staie durmenno.

E dint’a n’angulillo ’e chistu core,

io t’ ’o mettesse senza te scetà;

e comme fosse ’o meglio d’ ’e tesore,

tu ’o cacciasse quanno vuò sunnà.

E te sunnasse sulo cose belle,

e a salutarte, fore a ’sta fenesta,

scennesseno d’ ’o cielo’a luna e ’e stelle,

e ce parlasse... e fosse sempe festa.

E ’a dint’ ’o suonno io te tenesse mente,

sapennote felice mbraccio a mme.

E quanno te scetasse, alleramente,

tu me dicisse: « Aggio sunnato a te! »

© Claudio Pennino

Me pare 'e te vedé

a cósere, a stirà…

ME PARE ’E TE VEDE’

di Claudio Pennino

  

                         A mia madre

Mo ca cchiù coce ’o sole,

e ’a preta s’è ’nfucata,

me pare ’e te vedé,

mammà, tutta sudata.

Córrere annanze e areto:

a cucenà, a lavà…

spannere ’e panne ’nfuse…

a cósere, a stirà…

E pare ’e te sentì,

mentre t’asciutte ’e bracce:

« Oi’ ni’, t’hê fatto caro! »

Redenno m’ ’o rrinfacce

ca nun vengo a truvarte.

’O ssaccio che vulisse:

almeno ’o piccerillo

ll’êss’ ’a purtà cchiù spisse.

E pare ’e te vedé,

quanno ’int’ ’a refriscata,

guarde, for’ ’o balcone,

comme more ’a iurnata.

O mentre arracque ’e ppiante,

arze d’ ’o sole forte.

Mo, quanno ’e vvote passo,

me pare ’e vedé ’a morte.

’E scure ’e stu balcone

stanno sempe ’nzerrate…

i’ ’e ppiante c’arracquave

se so’ tutte seccate!

(da Vela ’e penziere, 1999)

Paggena 'e quaterno

Io so’ pe tte na paggena ’e quaterno

PAGGENA ’E QUATERNO

di Claudio Pennino

Io so’ pe tte na paggena ’e quaterno

addó screvive ’a storia ’e chist’ammore:

« ’O titolo - diciste - è “Ammore eterno”,

n’appoco e ’o dongo mmano ô stampatore. »

Po’, tutto nzieme, hê avutato fuoglio,

e m’hê cuntato tutto n’atu cunto.

« ’Sta storia - hê ditto - sfila comm’ a ll’uoglio:

 storia nosta, nce aggio miso ’o punto! »

© Claudio Pennino

Nu palummiello

’E vvoce d’ ’o ciardino, diceno: Chiuvarrà!

NU PALUMMIELLO

di Claudio Pennino

                                               da M. Desbordes-Valmore

’E vvoce d’ ’o ciardino, diceno: Chiuvarrà!,

e ogne cosa parpeta sentenno ’o tempurale;

tu nzierre’o libbro e pienze, bella e sentimentale,

« Chisà che sta facenno? Va trova addó starrà? ».

Llà bbascio, dint’a ll’ombra, pe sotto a na tittoia,

guardanno ll’urizzonte, cchiù cupo e pucundruso,

sta, comm’ a te, tremmanno, nu palummiello nfuso:

vedenno 'o cielo niro, chiamma ’a cumpagna soia.

Che fa ca chiove? È ddoce p’ ’e core turmentate!

Doppo ’a tempesta nasce ’a vita p’ogne cosa.

’O sole, senza ll’acqua, pò fà schiuppà na rosa?

’E core amante aspettano... pirciò, nun suspirate.

© Claudio Pennino

'A dispettosa

e torno cu ’a mimosa

’A DISPETTOSA

di Claudio Pennino

                                  otto marzo

Succede puntualmente,

comme succede ogn’anno;

ma faie ll’indifferente:

saccio che staie penzanno.

Aspiette ca me scordo

pe farme ’a dispettosa.

Invece, io mm’arricordo…

e torno cu ’a mimosa.

(da Vela ’e penziere, 1999)

Sentimentalmente

risponderò: Ah! quanto è bello ’o mare!

SENTIMENTALMENTE

di Ettore De Mura

L’amore nostro è amor sentimentale,

drogato con il cielo, il mar, le rose...

Non sono, queste, le più belle cose,

per soddisfare il sogno, l’ideale?

E il sentimento è quello che ci attacca...

senza manco nu soldo dint’ ’a sacca!

Cos’è il danaro? ossia: « la vil moneta »?

- come l’han definito gli scrittori -

Ci sposeremo senza soldi, e i cuori

avranno il sentimento sol per meta!

Ce vonno ’e scarpe e ’a veste, moglie mia?

I’ arapo ’o libbro e leggo na poesia!

E leggeremo insieme Sem Benelli,

D’Annunzio... un madrigale, una ballata;

faremo insieme qualche passeggiata,

ammireremo il volo degli uccelli...

E quando mi dirai: « Voglio mangiare! »

risponderò: Ah! quanto è bello ’o mare!

e veco ’a vocca toia carnosa e rossa

PENZIERO FISSO

di Claudio Pennino

I’ tengo ’ncapo nu penziero fisso

ca nun riesco cchiù a sbruglià ’a matassa.

Me sceta ’a dint’ ’o suonno, me scunquassa,

ca ’a notte, annanz’a mme, pare ll’abbisso.

P’ ’a strada mm’accumpagna passo passo.

Guardo ’e vvetrine e penzo sempe ’o stesso,

sbaréo sul’io p’ ’a luce ’e nu riflesso,

zompo si ’e bòtto sento ’e fà na tóssa.

Me ’ncanto annanz’a nu sciurillo russo,

e veco ’a vocca toia carnosa e rossa,

doce e zucosa comm’a na nanassa,

ca mm’accuntenta sulo cu ’e prumesse.

Ma i’ ’ncapo tengo nu penziero fisso:

si t’aggio a ttaglio, miettece ’a scummessa,

è inutile ca strille, nun te lasso

si nun te do’ nu muorzo ’mpont’ ’o musso.

(da Vela ’e penziere, 1999)

'E surdatielle

ca indiane e surdatielle,

erano frate e frate.

’E SURDATIELLE

di Claudio Pennino

Ncopp’ ê mmuntagn’ ’e carte,

pe terra, annascunnute,

ll’indiane ’a chesta parte,

cu ’e ffacce già tignute.

’A ll’atu pizzo “ ’e nuoste ”,

cu sciabbule e pistole,

ncopp’ ê cavalle, tuoste,

a ffila p’ ’e rriggiole.

E, indiano e surdatiello,

primm’ ’e pigliarse ’e mano,

parlavano, a penniello,

cu mme ’o nnapulitano.

E accumminciava ’a guerra:

n’esercito ’e surdate

accise, muorte nterra,

cu ’e piette spertusate.

E ’a fantasia vulava

pe mmiez’a ’sta battaglia;

ll’anema s’appicciava

comm’a nu fuoco ’e paglia.

.  .  .  .  .   .  .  .  .  .  .  .

Fernuta ’a iacuvella,

ferneva ’o serra-serra;

sunava ’a trummettella:

«Basta. È fernuta ’a guerra!»

E tutte ’sti surdate,

dint’a nu scatulillo,

venevano astipate,

chisto vicino a chillo.

E ’e surdatielle, tanno,

facennose capace,

redenno mo, e pazzianno,

turnavano a fà pace.

E dint’ ê scatulelle,

durmevano abbracciate:

ca indiane e surdatielle,

erano frate e frate.

(da Primma ca scura notte, 2009)