Bella Mbriana

 

BELLA MBRIANA

di Claudio Pennino



Bella Mbriana mia, bella Mbriana,
ca d’ ’a felicità si’ ’a primma fata,
dimme pecché, na vita sana sana,
p’ ’a strata mia nun t’aggio maie ncuntrata?

Bella Mbriana mia, famme capace,
’a gente dice ca tu si’ cecata;
dimme na cosa, si nun te dispiace,
comm’ è ca tutt’ ’a vita m’hê scanzata?

Da Villanelle, 2016

Mobbele antiquato

 

mo, comm’ a ccierti mobbele antiquate

MOBBELE ANTIQUATO

di Claudio Pennino
 
 
 
E finalmente, ’o vvi’, c’îmmo lassate:
’st’ammore, ca faceva mmiria ê sante,
mo, comm’ a ccierti mobbele antiquate,
nun va cchiù ’e moda, s’è ffatto ingombrante.

P’ ’o sestimà facive ’o pare e sparo,
e ogni vvota m’ ’o cagnave ’e posto:
sempe cchiù areto, sempe cchiù nascosto…
finché nun ce l’hê dato ô sapunaro.
 
 
 
© Claudio Pennino 2023

'O pedezzullo

 

’Stu pedezzullo ianco e aggraziato

’O PEDEZZULLO
 
di Claudio Pennino
 
 
’Stu pedezzullo ianco e aggraziato,
quanta penziere ca... mpietto me sceta;        
quanno v’ ’o guardo, ’int’ ’a cazetta ’e seta,
pare ca nu pittore l’ha pittato.
 
Pe v’ ’o puté surtanto accarezzà,
nun saccio io stesso che vulesse fà:
vulesse addeventà scarpa o chianella,
vulesse addeventà ’sta cazettella.
 
 
(da Villanelle, 2016)

Quanno vuó tu

 

quanno vuó tu, basta ca vutte e trase

QUANNO VUÓ TU

di Claudio Pennino



Torna quanno vuò tu, ca io t’aspetto,
avessen’ ’a passà pure cient’anne;
me truove sempe pronto, e cu rispetto,
’o posto mio è ccà, stongo ê cumanne.

T’aspetto e conto ll’anne, ’e mise e ll’ore,
e si me vence ’o suonno e dormo quase,
nun te dà pena, i’ lasso apierto ’o core,
quanno vuó tu, basta ca vutte e trase.

(da Villanelle, 2016)

Malatia

 

Malato me so’ mmiso dint’ ô lietto

MALATIA
 
di Claudio Pennino
 
 
 
 
Malato me so’ mmiso dint’ ô lietto
ca suppurtà nun pozzo nu dulore;
me coglie a ll’intrasatta iusto mpietto,
propio ’int’ ’o lato addó ce tengo ’o core.
 
Spiecà nisciuno sape ch’è ’stu mmale,
né miedeche, scenziate o spezïale;
e mmentre ognuno ’e lloro mette assisa,
tu tiene mente e ffaie nu pizzo a rrisa.
 
 
(Da Villanelle, 2016)

Tenimmoce abbracciate

 

Tenimmoce abbracciate

TENIMMOCE ABBRACCIATE
 
 
 
Tenimmoce abbracciate, mano a mmano,
ca chisto nun è ttiempo ’e ce fà male;
tenimmoce accussì pe n’anno sano:
accumminciammo ’a mo, ’a ’stu Natale.

Chillo ca è stato uffeso perdunasse,
e cchillo ca ll’ha fatta se pentesse;
p’addimustrà ca nun songo prumesse,
’o munno sano sano s’abbracciasse.

© Claudio Pennino

'A bbestia

 

Arresentuta, chella mmosta ’e diente

’A BBESTIA
 
di Claudio Pennino
 
 
 
Io tengo ncuorpo comm’ a n’animale
ca notte e gghiuorno me guarda ’int’ a ll’uocchie;
na bestia ca cuncerta sempe a mmale:
sulo si’ ’a guardo, tremmo ’int’ ê ddenocchie.
 
P’ ’a fà stà bbona, quann’ ’a tengo a ffianco,
lle mmocco fessarie ogni mmumento,
lle faccio vedé niro pure ’o gghianco,
e ’a dico ca a ’sta recchia nun ce sento.
 
Arresentuta, chella mmosta ’e diente,
ma i’ m’ ’a piglio comm’ a na resata.
E intanto ’a ggente nun ne sape niente
ca io campo cu na bbestia addubbechiata.
 
Pe cchistu fatto, campo mmiez’ ê bbotte,
penzanno a cchisà quale iuorno ’e chisto
se sceta ll’animale e... bbonanotte,
me magna sano sano e ttorna nzisto.

 
da Acqua salata, 2019

Streca 'e Beneviento

 

Ah, che m’hê fatto, streca ’e Beneviento

STRECA ’E BENEVIENTO

di Claudio Pennino


Ah, che m’hê fatto, streca ’e Beneviento,
nemmanco ’a via d’ ’a casa è cchiù sicura;
quanno tu passe, s’arrevota ’o viento,
sulo ’o penziero ’e te, me fa paura.

Anema nera, disperata e perza,
me sto’ facenno ’e ccroce a mana smerza;
pure ’stu core mio t’ha canusciuto:
cu n’aco avvelenato ll’hê pugnuto.

(da Villanelle, 2016)

'E passarielle

 

So’ ppassarielle e ccórreno

’E PASSARIELLE

di Claudio Pennino

So’ ppassarielle e ccórreno
d’ ’e nive cchiù lluntane,
quanno pe tterra avvìstano
na mullechella ’e pane.

S’accostano ’e cchiù ggiùvene
facenno nu ciù-ciù,
tanto ca mm’arricòrdano
ll’anne d’ ’a ggiuventù.

Po’, appriesso, secutànnose,
ne veneno tant’ate,
ca quanno so’ nu cuófano
nun l’aggio cchiù ccuntate.

«Comme ve mmirio, pàssare,
ca libbere vulate,
’a do’ venite e, a ll’ùrdemo,
diciteme: addó iate?»

Si ’a mano provo a stènnere
pe n’afferrà quaccuno,
mparanza se ne vòlano
e nun resta nisciuno.

E ppassarielle pàreno
ll’anne d’ ’a meglia età,
nun se fa a ttiempo a còglierle
ca so’ vvulate già.


(da Primma ca scura notte, 2009)

'E mmane stese

 

teneno ’e mmane stese

’E MMANE STESE

di Claudio Pennino

’E ttruove fore ê cchiese,

sott’ ’e fferze ’e velluto;

teneno ’e mmane stese,

e ccercano n’aiuto.

Si n’ommo cade nterra,

o smania pe na freva,

stenne na mano e afferra

na mano c’ ’o sulleva.

Pure nu criaturiello,

ca chiagne e ccerca ’a mamma,

vavuso e mmuccusiello,

cu ’e mmane stese ’a chiamma.

E ognuno, a chistu munno,

fosse gigante o nano,

quanno stà pe gghì a ffunno,

stenne sempe na mano.

Pecché ’sti mmane stese,

parlano senza voce,

ma, tennere e ’ndifese,

schiovano a Cristo ncroce.

Arrivano ’nzì ô ncielo,

patute, ma splennente,

e stracciano ogni vvelo

nnant’ a chi è ’ndifferente.

E ’o cielo è ’a perdunanza

a ttutto ’stu struppìo;

cercano na speranza:

trovano ’a mano ’e Ddio.

(da ’A pianta d’ ’a felicità, 2004)

Na vita nova

 

NA VITA NOVA

di Claudio Pennino

Voglio na zappa cu nu piezzo ’e terra,

pe ssemmenà patane e ppummarole...

’Sta vita sempe ’e corza, sempe nguerra,

ll’aggia cagnà cu ’e ffronne d’ ’e scarole.

Voglio parlà c’ ’aucielle, naturale...

comme si fosse io pure n’animale.

E voglio ’iettà ’sti panne ’a cuollo e, frisco,

dint’ a nu sacco, comm’ a San Francisco.

(da Vela ’e penziere, 1999)

'A luna

 

’A LUNA
 
di Claudio Pennino
 
 
 
Ncopp’ a nu specchio d’acqua,
- ianca ca pare ’e cera, -
na luna, tonna e llustra,
s’affaccia a pprimma sera.
 
Fermo, senza nu triémmolo,
’o mare s’è qquagliato,
e ppure ’o viento, pare,
ca se trattene ’o sciato.
 
Dint’ a ’stu specchio ’e luce
però cade na fronna,
e ’a luna, mille piezze,
se ll’arravoglia ll’onna.
 
E ncopp’ ’o mare pareno,
’sti ccrastulelle ’e luce,
nun già nu specchio rutto,
ma tanti lluce-luce.
 
Ma tutto acconcia ’o tiempo
e ogni strata schiana…
’o mare s’accuieta,
e ’a luna torna sana.
 
 
(da ’A strata d’ ’e stelle, 2001)