QUANNO NASCETTE NINNO
di Sant’Alfonso
Maria de’ Liguori
Quanno
nascette Ninno a Betlemme,
era nott’ e pareva miezo juorno.
Maje le stelle - lustre e belle
se vedetteno accossí;
e ’a cchiù lucente
jette a chiammà li Magge a
ll’Uriente.
De pressa se scetajeno
l’aucielle
cantanno de na forma tutta nova;
pe nsi’ ’agrille - co li strille
e zompanno ’a ccá e da llá.
È nato! È nato!
- decevano - lo Dio che nce ha criato!
Co tutto ch’era
vierno, Ninno bello,
nascetteno a migliara rose e sciure.
Pe nsi’ ’o ffieno - sicco e tuosto
che fuje puosto sotto a te,
se ’nfigliulette
e de frunnelle e sciure se vestette.
A no paese che se
chiamma Ngadde,
sciurettero le bigne e ascette ll’uva.
Ninno mio - sapuretiello,
rappusciello d’uva si’ Tu
ca, tutt’ammore,
faje doce ’a vocca e po’ ’mbriache ’o
core.
No nc’cerano nemmice
pe la terra,
la pecora pasceva c’ ’o lione;
co ’o crapetto - se vedette
’o liupardo pazzeà;
l’urzo e ’o vitiello,
e co lo lupo ’n pace ’o pecoriello.
S’arrevotaje ’nsomma
tutt’ ’o munno:
lu cielo, ’a terra, ’o mare, e tutt’
’e ggente.
Chi dormeva - se senteva
’mpiett’ ’o core a pazzeà
pe la priezza,
e se sonnava pace e contentezza.
Guardavano le
ppecore ’i Pasture,
e n’Angelo, sbrennente cchiù d’ ’o
sole,
comparette - e le dicette:
no ve spaventate, no;
contento e riso:
la terra è addeventata Paraviso.
A vvuje: è nato
ogge a Bettalemme,
d’ ’o munno, l’aspettato Sarvatore...
Dint’ ’e panne – ’o trovarrite,
no potite maje sgarrà,
arravugliato,
e dinto a lo Presebbio curcato.
A mmeliune ll’Angiule
calare...
Co chiste se mettenten’ a cantare:
Gloria a Dio - pace ’n terra,
no cchiù guerra... è nato già
lo Rre d’ammore,
che dà prejezza e pace a ogne core.
Sbatteva ’o core ’n
pietto a ssi pasture;
e ll’uno ’n faccia a ll’auto diceva:
che tardammo? - Priesto, jammo,
ca mme sento scevolì,
pe lo golìo
che tengo de vedé sso Ninno Dio.
Zompanno, comm’a
ciéreve ferute,
correttero ’i pasture a la Capanna;
llà trovajeno - a Maria
co Giuseppe e ’a Gioja mia...
e ’n chillo viso
provajeno no muorzo ’e Paraviso.
Restajeno ’ncantate
a bocc’apierte
pe tanto tiempo senza dì parola...
Po jettanno -
lacremanno
no sospiro pe sfocà,
da dint’ ’o core
cacciajeno, a migliara, atte d’ammore.
Co ’a scusa de
donare li presiente,
se jetteno azzeccanno chiano chiano.
Ninno no - lli rrifiutaje,
ll’azzettaje comm’ a ddì,
ca lle mettette
le mmane ’n capo e le benedicette.
Piglianno
confedenzia a poco a poco,
cercajeno licenzia a la Mamma:
se mangiajeno - li pedille
co vvasille - ’n primmo, e po’
chelle mannelle,
a ll’urtemo lo musso e ’i mascarielle.
Po’ assieme se
mettetteno a sonare
e a cantá co ll’Angiule e Maria,
co na voce - accossí doce,
che Gesù facette: aaah, aaah...
E po’ chiudette
chill’uocchie aggraziate e s’addurmette.
La nonna che
cantajeno mme pare
ch’avett’ ’a esse’ chesta
che mmo dico.
Ma ’nfrattanto - io
la canto,
mmaggenateve de stà
co li Pasture
vicino a Ninno
bello vuje pure.
(intermezzo)
“ Viene, Suonno da
lo cielo,
vien’ e adduorme sso Nennillo;
pe pietá, ch’è piccerillo;
viene, Suonno, e non tardá.
Gioja bella de sto
core,
vorria suonno arreventare,
doce doce pe te fare
st’uocchie belle addormentá.
Ma si Tu, p’essere
amato
Te si’ fatto Bammeniello,
sulo Ammore è o sunnariello
che dormire Te pò fá.
Ment’è chesto puó
fà nonna,
pe Te st’arma è arza e bona;
T’amo, t’a...Uh! Sta canzona
giá t’ha fatto addobbeá.
T’amo, Dio - bello
mio;
t’amo, Gioja, t’amo, t’a...”.
Cantanno po’ e
sonanno, li Pasture
tornajeno a le
mantre n’ata vota:
Ma che buò? - che
cchiù arrecietto
non trovajeno ’int’
a lu pietto...
A ’o caro Bene,
fecevan’ ogni poco
’o va e biene.
Lo ’nfierno
solamente e ’i peccature,
’ncocciuse comm’ a isso e ostinate
se mettetteno - a ppaura,
pecché a scura vonno stá
li spurtegliune,
fujenno da lu sole, li briccune.
Io pure songo niro
peccatore,
ma no boglio èsse’ cuoccio e ostinato.
Io non boglio - cchiù peccare,
voglio amare, voglio stá
co Ninno bello
comme nce sta lo voje e ll’aseniello.
Nennillo mio Tu si’ sole d’ammore:
faje luce e scarfe pure ’o peccatore;
quanno è tutto - niro e brutto
comm’ a pece, tanno cchiù
lo tiene mente...
E ’o faje arreventà bello e sbrennente.
Ma Tu mme diciarraje ca chiagniste,
acciò chiagnesse pure ’o peccatore.
Aggio tuorto – Ahje! fosse muorto
n’ora primma de peccà!
Tu m’haje amato,
e io, pe’ paga, t’aggio maltrattato.
Ah, buje, uocchie
mieje, doje fontane
avit’ ’a fá, de lacreme, chiagnenno...
Pe’ llavare - pe’ scarfare,
li pedilli de Giesù;
chi sa, pracato,
decesse: via, ca t’aggio perdonato.
Viato a me si aggio
sta fortuna!
Che maje pozzo cchiù desiderare?
O Maria - Speranza mia
ment’ io chiagno, prega Tu:
penza ca pure
si’ fatta mamma de li peccature.
